Faragullos
Unha receita da Mariña case perdida, pero un dos almorzos favoritos dos meus fillos. Facémonos fortes na aldea gala.
Ingredientes para 2 rapaces con apetito
- 3 ovos
- 3 culleradas grandes de fariña
- 3/4 cunca de leite
- manteiga
- liscos ao gusto
- sal
- Bate os ovos e a fariña até obter unha masa homoxénea.
- Engade o leite e un chisco de sal e mestura ben. Deberá quedar co aspecto dun amoado de filloas mesto.
- Deixa repousar uns minutos.
- Se usas liscos, pon nunha pota de aceiro a lume medio-baixo até os dourar. Reserva.
- Engade un pouco de manteiga, se ves que o touciño non soltou moita graxa.
- Baixa o lume e engade o amoado. Deixao callar un pouco.
- Cunha espátula de aceiro ou, mellor aínda, cunha rasqueta de padaría, comeza a partir a masa en anacos cada vez máis pequenos —sen apagar o lume—. Isto pode levar uns 10-15 minutos.
- Cando obteñas anacos do tamaño axeitado (xulga ti), bota os liscos sobre os faragullos, remexe e serve.
Na miña casa tómanse con azucre, pero disque hai xente que os toma con mel.